呢單野本來都算告一段落,不過好多人由頭到尾都似乎睇錯左個重點........
其實NOW搞既論壇根本係一個局,你地細心諗下佢set既規則:"四分鐘任雙方自由答問",根本就係引人犯罪, 如果有腦而又錫身既人一定唔會參與,不過問題係選舉當前,放過宣傳機會就等於直接退選,所以硬住頭皮都要上;至於無料又要參與呢種遊戲既人,被踐踏是意料中事,要怪就怪佢自己太天真太傻(基本上民主黨好多呢類人);個案中最抵死既係唔完全理解個遊戲,但又以為自己可以壓得住場果d傻人,無錯,我正正係講緊民建聯
其實民建聯近幾年吸納左好多不學無術既好勇鬥狠之輩,好似馬力、菜菜子果類真正心繫家國既傳統左派已經買少見少,果班所謂第二梯隊大部份都經曾鈺成、劉江華傳授埋一堆抹黑、中傷、偷換概念既下三濫招數,對付d二流泛民之士的確係可過足高手癮,不過唔知係佢地學藝不精定上邊d人留一手,佢地對住毓民、長毛、阿牛、大舊呢班正宗左佬就真係好似"家貓對住老虎",多多都唔夠死,明知有呢d叔父輩在場好心就唔好咁臭串啦,道理就已經無,急才又唔夠,辯論技巧更係少得可憐,想玩大聲玩人身攻擊?人地廿年前已經唔玩啦,而且響今次事件上,癲狗只係用番民建聯剛用過既技倆,既然"中港無"用呢招時NOW既主持無阻止,就即係默許呢種"技術",可惜佢地無去預計對手會"以其人之道還示其人之身",失敗中既失敗,民建聯班友無理由唔知道自己係處於四面楚歌,若果要利用NOW論壇既規則、漏洞去達到中傷抹黑效果,應該睇住個勢,留到最後一刻至進攻,然後等人地無仇報,不過"中港無"條傻仔卻急於立威,結果咪"無啦啦整tat啦",引來精於發爛而又睇唔過眼既黃毓民0趙到豬頭咁law,呢鑊佢真係完美地示範左乜野叫"自己攞黎賤"
雖然係非常無面,但其實又唔代表對民建聯既票真係咁大影響,因為中國人普遍都係追求一種虛偽既和平表象, 只要你貫徹咁去呃自己講果d乜野理性建設、愛中國既大話,自然好多唔鍾意分析既選民會投你票;不過如果真係有乜閃失,令民建聯以少數落敗攞少席,中港無就可能會成為罪人,其他等上位既兄弟絕對唔會同佢老哥客氣,肯定會大興問罪之師,佢地話晒都成萬會員,何況而家個民建聯亦唔係十年前果個,你估真係咁多人同你愛國愛黨咩,有d野大家心照啦
所以有人話政客都是無恥的,呢句話本身有d語病,因為參與政治既人都只係根據個規則去玩,好似今次既事件好多人話無乜辯論技巧,只係見到對罵,咁就當然啦,因為個規則根本係不利於辯論,既無人評審,犯規又唔會扣分,唔去盡就正傻仔;立法局都係一樣,歸根究底就係當年編寫基本法班友想你地響呢個畸形制度上鬼打鬼乜都做唔到,亦估計到香港人唔會齊心去解決呢d要"以下犯上"至可以解決既問題,結果就係班北佬同商界既無形之手可以好容易咁控制香港呢舊肥豬肉
鬼佬有句說話:don't hate the player,just hate the game,大家不妨深思一下
